ഇഞ്ചിയുടെ ഉപയോഗങ്ങള്‍

Botanical Name : Zingiber officinale
സംസ്‌കൃതം - ശുണ്ഡി
തമിഴ്, മലയാളം - ഇഞ്ചി

ആയുര്‍വേദത്തിലെ മഹാവീര്യമുള്ള ഒരു ഔഷധമാണ് ഇഞ്ചി. ത്രികടുവിലെ ചുക്ക് ഇഞ്ചി ഉണക്കിയെടുക്കുന്നതാണ്. ത്രികടു എല്ലാ ഔഷധക്കൂട്ടുകളിലും ഉള്‍പ്പെടുന്നു. മിക്ക ഭക്ഷണപദാര്‍ത്ഥങ്ങളിലും ഇഞ്ചി സാധാരണയായി ഉപയോഗിച്ചുവരുന്നു.

ദഹനക്കേട്, ഗ്യാസ്ട്രബിള്‍

1. ഇഞ്ചിനീരും ചെറുനാരങ്ങാനീരും തുല്യഭാഗം ഇന്തുപ്പും കൂട്ടി കഴിക്കുക.
2. കുരുമുളകും ജീരകവും സമം പൊടിച്ച് അല്പം ഇഞ്ചിനീരില്‍ ചേര്‍ത്ത് കഴിക്കുക.

നീരിളക്കത്തിന്

1. ഇഞ്ചിനീരും സമം തേനും ചേര്‍ത്ത് ഓരോ സ്പൂണ്‍ വീതം പലപ്രാവശ്യം കഴിക്കുക.
2. പുറത്തെ തൊലി ചുരണ്ടിക്കളഞ്ഞ് ഇഞ്ചി ചെറുകഷണങ്ങളാക്കി തേനിലിട്ട് സൂകഷിക്കുക. മൂന്നുമാസത്തിനുശേഷം കുറേശ്ശെ ദിവസവും കഴിക്കുക.
3. ഇഞ്ചി അരച്ചതും ശര്‍ക്കരയും കൂട്ടി ചുക്ക് കഷായവുമായി കഴിക്കുക.
4. ഇഞ്ചി ചതച്ച് പശുവിന്‍ പാലില്‍ ഇട്ട് കാച്ചി കുടിക്കുക.

കണ്ഠരോഗം, ചുമ, അര്‍ശ്ശസ്, ശ്വാസം മുട്ടല്‍, ചുമ

ചുക്ക് അഞ്ചുഭാഗം, ചെറുതിപ്പലി നാലുഭാഗം, കുരുമുളക് മൂന്നുഭാഗം, നാഗപ്പൂവ് രണ്ടുഭാഗം, ഏലത്തരി ഒരുഭാഗം ഇവ പൊടിച്ച് സമം ചേര്‍ത്ത് ഒരു മാസം തുടര്‍ച്ചയായി സേവിക്കുക. ഇത് സ്വരത്തെ നന്നാക്കുന്നു.

ശരീരപുഷ്ടിക്ക്

ചുക്ക് ഒരുഭാഗം, ശര്‍ക്കര രണ്ടുഭാഗം, വറുത്ത എള്ള് നാലുഭാഗം, ചുക്കും എള്ളും പ്രത്യേകം പൊടിച്ചു വേണ്ടത്ര ശര്‍ക്കരയും ചേര്‍ത്ത് വീണ്ടു നല്ലതുപോലെ ഇടിച്ച് ചേര്‍ത്ത് കുറേശ്ശെ ദിവസവും കഴിക്കുക.

ഹൃദ്രോഗം

ചുക്ക് കഷായത്തില്‍ അല്പം കായവും തൂവര്‍ച്ചില ഉപ്പും ചേര്‍ത്ത് കഴിക്കുക.

വാതസംബന്ധമായ രോഗങ്ങള്‍ക്കും, സന്ധികളില്‍ ഉണ്ടാകുന്ന നീരിനും

1. ചുക്ക് അരച്ച് വാഴയിലകൊണ്ട് പൊതിഞ്ഞ് ആവിയില്‍ വച്ചോ, അടുപ്പിലിട്ടു ചൂടാക്കിയോ നീരെടുത്ത് ആവണക്കിന്‍ വേരിട്ട് കഷായവും, അല്പം തേനുമായി ചേര്‍ത്ത് കഴിക്കുക.

2. ചുക്കും പെരുങ്കായവും കൂടെ അരച്ച് വേദനയുള്ള സ്ഥലങ്ങളില്‍ ഇടുക.

തലവേദന

നെറ്റിയിലും പുരികത്തിനുമുകളിനും ഉണ്ടാകുന്ന തലവേദനയ്ക്ക് അര സ്പൂണ്‍ പൊടി വെള്ളത്തില്‍ ചാലിച്ച് ചൂടാക്കി വേദനയുള്ള ഭാഗങ്ങളില്‍ പുരട്ടുക.

തുമ്മല്‍, പനി, വായുക്ഷോഭം, വിളര്‍ച്ച

ചുക്ക് കല്‍ക്കമായി കാച്ചിയെടുത്ത് നെയ്യ് ദിവസവും ഉപയോഗിക്കുക.

നീരിന് പുറമെ പുരട്ടാന്‍

ചുക്ക്, വേട്ടാവളിയന്‍കൂട്, കറിവേപ്പില, ഉമ്മത്തിന്റെ ഇല, ഇന്തുപ്പ് ഇവ കാടി കൂട്ടി അരച്ച് കാടിയില്‍ കലക്കി നന്നായി ചൂടാക്കി അല്പം ആറിയ ശേഷം പുരട്ടുക.

പാമ്പു കടിച്ചുണ്ടാകുന്ന നീരിനും ഇത് വിശിഷ്ടമാണ്.

ദഹനക്കേട്, ഛര്‍ദ്ദി

ഇഞ്ചി ചെറുതായി നുറുക്കി നെയ്യില്‍ വറുത്തത് ഒരുഭാഗം, ജീരകം നെയ്യില്‍ വറുത്തത് ഒരുഭാഗം, മലര് രണ്ടുഭാഗം, കല്‍ക്കണ്ടം നാലുഭാഗം എല്ലാം കൂടെ പൊടിച്ച് യോജിപ്പിച്ച് കൂടെകൂടെ കഴിക്കുക.