കുരുമുളകിന്റെ ഉപയോഗങ്ങള്‍

 Botanical Name - Piper nigrum
സംസ്‌കൃതം - മരിചം
തമിഴ് - മിളഗു
മലയാളം - കുരുമുളക്

അന്തര്‍ദ്ദേശീയ പ്രശസ്തിയാര്‍ജ്ജിച്ചിട്ടുള്ള കുരുമുളക്, വേദകാലം മുതല്‍ ഭാരതീയര്‍ ഉപയോഗിച്ചു വന്നിരുന്നു. കുരുമുളക് പൊടിയോ, സത്തോ, ഇന്ന് പലതരം ഭക്ഷണസാധനങ്ങളിലും, മധുരപദാര്‍ത്ഥങ്ങളിലും രുചിക്കും ദഹനത്തിനും, മണത്തിനും വേണ്ടി ചേര്‍ത്തുവരുന്നു.

പനിക്ക് കുരുമുളക് കാപ്പി

കുരുമുളക്, ചുക്ക്, കൊത്തമല്ലി, ജീരകം എന്നിവ ചതച്ച് കുറച്ച് കൃഷ്ണതുളസിയിലയും ചക്കരയും ചേര്‍ത്ത് വെള്ളത്തിലിട്ട് തിളപ്പിച്ച് അത് പലവട്ടം കഴിക്കുക.

കുരുമുളക് രസം

ഭക്ഷണത്തോട് ചേര്‍ത്ത് കഴിക്കുക. കുരുമുളക് 50 ഗ്രാം ചതച്ച് അത്രയും തൂവപരിപ്പും ചേര്‍ത്ത് അല്പം നെയ്യില്‍ വറുത്ത് വെള്ളത്തിലിട്ട് ആവശ്യത്തിന് ഉപ്പും അല്പം ചെറുനാരങ്ങാനീരും ചേര്‍ത്ത് തിളപ്പിക്കുക. തിളയ്ക്കുമ്പോള്‍ ജീരകം, കടുക്, ഉലുവ എന്നിവ അല്പം നെയ്യില്‍ വറുത്ത് പൊടിച്ചു ചേര്‍ക്കുക. കുറച്ചു കറിവേപ്പിലയും, മല്ലിയിലയും ഇടുക. ഇത് ആവശമനുസരിച്ച് ഉപയോഗിക്കാം.

ചുമയ്ക്കും, ശ്വാസംമുട്ടലിനും

1. കുരുമുളക് പൊടി, തേനും നെയ്യുമായി ചേര്‍ത്ത് കഴിക്കുന്നത് എല്ലാ വിധത്തിലുമുള്ള ചുമകള്‍ക്കും നല്ലതാണ്.
2. കുരുമുളക അര്‍ക്കം കുറച്ച് തിളപ്പിച്ചാറിയ വെള്ളത്തില്‍ കഴിക്കുന്നത് ചുമയ്ക്കും ശ്വാസംമുട്ടലിനും നല്ലതാണ്.

പീനസം മാറുന്നതിന്

കുരുമുളക് പൊടി മോരിലോ, തൈരിലോ കല്ക്കി അല്പം ഇന്തുപ്പും ചേര്‍ത്ത് തിളപ്പിച്ചാറിയ വെള്ളത്തില്‍ ചേര്‍ത്ത് കഴിക്കുക.

അതിസാരത്തിന്

കുരുമുളക് പൊടിയും അല്പം ഇന്തുപ്പും ചേര്‍ത്ത് തിളപ്പിച്ചാറിയ വെള്ളത്തില്‍ കഴിക്കുക.

അര്‍ശ്ശസിന്

കുരുമുളക് പൊടി ഒരുഭാഗം, പെരുംജീരകത്തിന്റെ പൊടി ഒന്നരഭാഗം ഇവ തേനില്‍ നല്ലതുപോലെ യോജിപ്പിച്ച് ഒരു സ്പൂണ്‍ വീതം ദിവസവും രണ്ടുനേരം കഴിക്കുക.

ദന്തരോഗങ്ങള്‍ക്ക്

കുരുമുളക് പൊടി കായാമ്പൂ സത്തില്‍ ചേര്‍ത്ത് പഞ്ഞിയിലാക്കി കേടുള്ള പല്ലില്‍ വയ്ക്കുക.

വസൂരിക്ക്

കുരുമുളകും, രുദ്രാകഷവും പച്ചവെള്ളത്തില്‍ അരച്ചു സേവിക്കുക. വസൂരി വരാതിരിക്കുവാന്‍ ഒരു പ്രതിവിധിയായും കഴിക്കാവുന്നതാണ്.

ദഹനക്കേടിന്

ചുക്ക്, കുരുമുളക്, തിപ്പലി, പെരുംജീരകം, ഇന്തുപ്പ് ഇവ സമം പൊടിച്ച് അര സ്പൂണ്‍ വീതം ദിവസവും കഴിക്കുക.

കുരുമുളക് ഒരു വിഷനാശിനിയാണ്

1. കുരുമുളക് 6, ദര്‍ഭപ്പുല്ല് ഒരു പിടി, ജീരകം രണ്ടു നുള്ള് ഇവ നല്ലതുപോലെ അരച്ച് ഒരു നെല്ലിക്ക അളവില്‍ ദിവസേന കഴിച്ച് പാല്‍ കുടിച്ചാല്‍ എല്ലാവിധ വിഷാംശങ്ങളും മാറുന്നതാണ്.
2. ഏതെങ്കിലും വിഷം ഉള്ളില്‍ പോയിട്ടുണ്ടെന്നറിഞ്ഞാല്‍ അല്പം കുരുമുളക് പൊടി തേനില്‍ കുഴച്ച് സേവിക്കുക.

രോഗമില്ലാതെ കട്ടിയാഹാരം കഴിക്കുമ്പോള്‍

1. അല്പം കുരുമുളക് പൊടി ചേര്‍ത്ത് കഴിക്കുക.
2. ഭക്ഷണശേഷം നാലഞ്ചു കുരുമുളകും അല്പം ഉപ്പും വയിലിട്ട് ചവച്ചിറക്കുക.

കുരുമുളക് ചേര്‍ത്തിട്ടുള്ള ആഹാരം കഴിക്കുന്നത് സിരകളുടെയും ധമനികളുടെയും ദ്വാരം അടയാതിരിക്കുന്നതിനും രക്തം കട്ടിപിടിക്കുന്നതിനും വളരെ നല്ലതാണ്.